Tag: kenya

Serikali ya Kenya ina mpango wa kuanzisha usafiri wa magari ya nyaya angani mwakani. Hayo ni kwa mujibu wa mkurugenzi mkuu wa shirika la huduma za kivuko cha feri nchini Kenya – Bakari Gowa.

Gowa ameeleza kwamba tayari magari hayo yataanza kutengenezwa mwezi ujao huko Ujerumani.

“Itachukua kama mwaka mmoja hivi magari hayo kutengenezwa kisha yataletwa Kenya mwaka ujao yaanze kazi ya kubeba watu angani kuwavukisha katika kivuko cha Likoni,” anasema Gowa.

Je, magari haya ya nyaya yatasafirisha watu vipi?

Magari haya yatakuwa juu ya hewa yakitumia umeme. Nyaya hutumiwa kuyavuta au kuyashusha kwa utulivu.

‘Cable cars’ – kama yanavyofahamika hayatumii injini na badala yake huvutwa kwa nyaya inayozungushwa kwa mota.

Magari hayo yanatarajiwa kuchukua takriban dakika tatu kuvukisha watu kwa kasi.

Tutakua na kituo kikubwa hapa karibu na afisi zetu Likoni na kituo kingine upande huo wa Mombasa mjini, ameeleza Gowa.

“Yatakua yanabeba watu thelathini na moja kwa kila safari, magari yote ni ishirini na nane. Kwa kila saa yatabeba watu elfu moja mia tano na kwa siku watu laki moja elfu mia nane.”

Kwa kawaida wasafiri wa kivuko cha feri katika eneo la Likoni pwani ya Kenya hawatoziw fedha, lakini Gowa anasema safari ya gari la nyaya haitakua bure.

“Tutawalipisha ada ya chini kabisa ya shillingi ishirini za Kenya, na endapo mtu ana mzigo atalipa zaidi lakini haitapita shillingi hamsini za Kenya.

Mizigo isiozidi kilo hamsini itakubaliwa katika magari hayo. Kupanda juu watatumia lifti kwa hivyo ni raha pia kutumia usafiri huo.”

Mpango huo unanuiwa pia kuwa njia moja ya kuwavutia watalii na Wakenya kwa jumla.

“Wasafiri wakiwa juu ya gari hilo la nyaya wataona kwa uzuri kabisa kisiwa cha Mombasa. Kuanzia chini hadi juu ni mita themanini. Watalii bila shaka watavutiwa na gari hilo.”

Usalama nao ukoje maanake miongoni mwa Wakenya watakua na hofu kusafiri kwa gari hilo la nyaya angani, wengine wakijiuliza nyaya hizo zikikatika itakuaje.

Magari hayo hutumika sana ng’ambo hasa bara Ulaya na Marekani.

Gowa anawahakikishia wasafiri wasiwe na hofu kwa sababu watatilia maanani kabisa suala la usalama.

“Tutaangazia usalama wa wasafiri kwa kubadilisha nyaya mara kwa mara na kuweka nyingine mpya kama kuna tatizo.

Magari haya ni salama na ndio kwa maana tunatumia kampuni hiyo ya Ujerumani ambayo ni maarufu sana duniani. Binafsi sijasikia ajali yoyote inayohusu magari haya ya nyaya duniani.”

Kulingana na Gowa, Kenya litakua taifa la pili barani Afrika kutumia usafiri wa magari ya nyaya baada ya Afrika Kusini.

“Magari haya huko Afrika Kusini hutumiwa sana na watalii lakini sisi tutayatumia kusafirisha watu na kwa utalii pia. Hatimaye tutapanua usafiri huo hadi uwanja wa ndege mjini Mombasa na katika mji wa Malindi ikiwezena”.

 

Mradi wa reli mpya ya kisasa nchini Kenya SGR umesababisha
hasara ya $100m (£76m) katika kipindi cha mwaka wa kwanza wa
operesheni zake , kulingana na wizara ya uchukuzi nchini humo.
Mradi huo uliofadhiliwa na serikali ya China ambao unaunganisha
mji wa pwani wa Mombasa na Nairobi ulifadhiliwa kwa mkopo wa
kima cha $3bn kutoka kwa benki ya China ya Exim katika kipindi
cha miaka 15.
Serikali ya Kenya ilipinga madai kwamba bei ya ujenzi wa mradi huo
wa reli iliongezwa, haiwezi kudumishwa na haifai kiuchumi.
Reli hiyo ya SGR ni miongoni mwa miradi muhimu ilioahidiwa na
rais Uhuru Kenyatta katika uchaguzi wake, ukizinduliwa mwezi
mmoja kabla ya uchaguzi wa urais uliopita.
Huku treni za abiria zikijaa mara kwa mara, waziri wa uchukuzi
James Macharia aliambia kamati ya bunge kwamba ilikuwa vigumu
kuwarai wenye mizigo kusafirisha mizigo hiyo kupitia reli kutoka
kwa barabara.
Mipango ya kuanza kulipa deni hilo inatarajiwa kuanza mwaka ujao,
na iwapo reli hiyo itashindwa kujilipia deni hilo basi huenda walipa
kodi wa Kenya wakalazimika kulipa deni hilo.
Wanauchumi wanakadiria kwamba China sasa inamiliki asilimia 70
ya deni la Kenya.
Hatahivyo serikali inatumai kwamba reli hiyo itaanza kupata faida
katika kipindi kijacho cha fedha.

Mtu aliyetuhumiwa kwa kuuza nyama ya paka wauzaji sambusa amehukumwa kifungo cha miaka mitatu na mahakama ya Nakuru

Hakimu mkuu Benard Mararo alimhukumu James Mukangu Kimani baada ya kukiri kosa hilo alipowasili katika mahakama hiyo siku ya Jumatatu.

Bwana Kimani alishtakiwa kwa kuchinja na kuuza nyama ya paka kwa wateja wake mnamo mwezi Juni 24 mjini Nakuru.

Alishtakiwa kwamba alimchinja paka kwa matumizi ya binaadamu kinyume na sheria ya chakula , dawa na kemikali.

Mwanamume huyo alikamatwa Jumapili ambapo inadaiwa alipatikana akimchuna ngozi paka.

Gazeti la Star linasema mwenyewe alikiri kupika sambusa akitumia nyama hiyo.

Taarifa kwenye vyombo vya habari Kenya zinasema mwanamume huyo alikiri kuuza nyama ya paka zaidi ya elfu moja mjini humo tangu mwaka 2012.

 

Wizara ya Elimu nchini Kenya imeivunjilia mbali bodi ya usimamizi wa shule ya Moi Girls na kutangaza kwamba ni marufuku kuwatembelea watoto shuleni baada ya mapumziko ya katikati ya muhula kwa shule zote za upili za umma.

Hii ni kufuatia uchunguzi unaoendelea kubaini kesi ya ubakaji wa mwanafunzi katika shule hiyo.

Waziri wa Elimu nchini Amina Mohammed alitoa agizo kwa maafisa katika wizara yake wafanye upya ukaguzi wa usalama katika shule zote kuepuka uwezekano wa wanafunzi kuingiliwa.

Mwalimu mkuu katika shule ya upili ya Moi Girls amewasilisha ombi kwa tume ya kuwaajiri walimu nchini TSC, kutaka kustaafu mapema baada ya kuzuka tuhuma za kubakwa kwa mwanafunzi katika shule hiyo mwishoni mwa juma ndani ya shule hiyo.

Walimu pamoja na wafanyakazi wengine wakiume katika shule ya upili ya Moi Girls Nairobi wametakiwa kufanyikwa uchunguzi wa DNA wakati maafisa wa upelelezi wanajaribu kuchunguza tuhuma za kubakwa kwa mwanafunzi katika shule hiyo Ijumaa usiku.

Polisi wamewaagiza walimu hao wa kiume, walinzi na jamaa wa kiume wa walimu wanaoishi ndani ya Shule hiyo au wale wanaoaminika kuwa walikuwa ndani ya shule hiyo mapema Jumamosi asubuhi.

Uchunguzi huo wa DNA ni muhimu katika kubaini kesi za unyanyasaji wa kingono na hutumika kumithilisha mshukiwa dhidi ya maji maji yanayopatikana katika mwili wa muathiriwa na hivyo kuweza kuwana ushahidi mzito katika kesi.

Itasaidia pia kubaini iwapo washukiwa wataokaochunguzwa walikuwa katika eneo la tukio hilo la uhalifu au kuwaondoshea makosa yoyote.

Polisi wanajaribu kuchunguza matukio yaliojiri usiku huo wa mkasa na siku ya pili iliyofuata kujua ukweli upo wapi katika tuhuma hizo za kubakwa kwa wanafunzi wa Moi Girls ambazo zimezusha hasira kubwa nchini.

Nchini Kenya Wamama wameandamana leo mjini Nairobi kulalamika tuhuma za mwanamke mwenzao kufukuzwa eneo lake la kazi (Mgahawani) kwa sababu alinyonyesha mtoto wake akiwa kazini, jambo ambalo liliinua hasira kwa wakina mama wengi nchini humo na kufikia hatua ya kuanza kuingia barabarani wakielekea katika mgahawa huo, ambako mama huyo anatuhumu kuwa aliambiwa ajifunike wakati anamnyonyesha mtoto wake mwenye umri wa mwaka mmoja.
Mama huyo alieleza kwamba yeye alipokuwa ananyonyesha mtoto wake aliambiwa akanyonyeshee chooni, jambo lililomfanya ajione kama kadharauliwa.
Taarifa hiyo imezusha hisia kali kote nchini na kusababisha makundi ya kutetea haki za wanawake kuandaa maandamano ya leo mjini Nairobi.
Mgahawa huo umeomba utulivu udumishwe kufutia ghadhabu hiyo kubwa ya wanawake nchini ukiomba kupewa muda kulishughulikia suala hilo kwa ndani.
Mojawapo ya mashirika yalioshiriki maandamano hayo leo ni Muungano wa mawakili wanawake FIDA.
Unasema dhamira kuu ya maandamano ya leo ni kushinikiza haki za akina mama waungwe mkono na kusaidiwa katika kufanikisha kuwanyonyesha watoto wao bila ya ubaguzi wa aina yoyote.
Sheria ya afya nchini inaeleza kuwa waajiri wote nchini wanastahili kutenga nafasi kuwaruhusu wanawake kuwanyonyesha watoto wao katika maeneo ya kazi.
Kadhalika kampeni imeanzishwa kwenye mitandao ya kijamii kushinikiza haki za mama na mwana.

Zaidi ya watu 40 wamefariki na maelfu wengine wameachwa bila ya makaazi wakati bwawa moja mjini Nakuru nchini Kenya lilipovunja kuta zake Jumatano usiku.

Shirika la kupambana na majanga nchini Kenya linasema watu wengine wengi hawajulikani waliko kufikia sasa.

Eneo hilo la Solai katika kaunti ya Nakuru Kenya, lina mabwawa saba yanayotumika katika kilimo cha umwagiliaji.

Waziri wa mambo ya ndani Kenya Fred Matiang’i amesema serikali imeanzisha uchunguzi kubaini uthabiti wa mabwawa mengine sita yaliosalia.

Maafisa wa uokozi kutoka mashirika tofauti nchini wamekuwa katika jitihada za kutafuta miili ya watu waliokufa kutokana na mkasa huo.

Mapema leo Ijumaa kulikuwa na hisia ya wasiwasi wakati taarifa zilisambaa katika mitandao ya kijamii kwamba bwawa la pili limepasuka katika eneo lilo hilo.

Msemaji katika wizara ya mambo ya ndani Kenya Mwenda Njoka hatahivyo amekanusha taarifa hizo katika ujumbe aliotuma kwenye Twitter akieleza kwamba maji hayo yametokana na shughuli za wahandisi wanaopunguza kiwango cha maji yaliojaa katika mabwawa mengine katika eneo hilo.

Njoka amesema hatua hiyo imefanywa chini ya udhibiti wa wataalamu ili kuruhusu ukaguzi wa mabwawa hayo.

Bwawa la Patel mjini Nakuru katika mkoa wa bonde la ufa lilivunja kuta zake Jumatano usiku na kusomba mamia ya nyumba za wakaazi waliokuwa karibu na eneo hilo.

Walioshuhudia wanasema walisikia mshindo mkubwa kabla ya mawimbi makubwa kuyasomba makaazi na mashamba ya watu yenye umbali wa takriban kilomita mbili, eneo ambalo watu wengi wanaishi na kufanya kazi.

Jitihada za kuwatafuta manusuru zilisitishwa jana usiku kutokana na kutanda giza, hatahivyo inahofiwa kwamva huenda idadi ya watu waliofariki ikaongezeka wakati jitihada zikiendelea leo kuwatafuta manusura.

Huu ni mkasa wa kwanza wenye ukubwa wa aina hii kuwahi kushuhudiwa Kenya.

Zaidi ya watu 2000 wameachwa bila ya makaazi.

Bwawa hilo la Patel ni mojawapo ya mabwawa matatu yanayomilikiwa na mkulima mmoja mkubwa katika eneo hilo.

Inaarifiwa kwamba kuta zake zilibomoka kutokana na maji mengi yaliokusanyika kufutia mvua kubwa inayoendelea kunyesha nchini.

Viongozi wa eneo hilo sasa wanataka kujuwa iwapo mkulima huyo ana kibali kilichomruhusu kujenga mabwawa hayo, huku kukiwa na wasiwasi kuhusu hali ya mabwawa mawili yaliosalia ambayo pia yanatajwa kuwa yamejaa.

Wanasayansi wa anga za juu kutoka Kenya waliokiunda chombo hicho tayari wako katika makao ya Uchunguzi wa Sayansi ya Anga za juu nchini Japan, (JAXA) ambapo chombo hicho kitarushwa kutoka huko.

Nchini Kenya kwenyewe raia wataweza kufuatilia shughuli hiyo moja kwa moja kwenye mtandao wa You Tube, na sherehe maalumu ya kushuhudia imeandaliwa katika chuo kikuu cha Nairobi.

Satelaiti hiyo ndogo ni ya thamani ya dola milioni moja – gharama inayoonekana kuwa ndogo kifedha kwa kiwango cha sayansi ya anga za juu.

Imebandikwa kamera mbili pamoja na vyombo vya kunasa na kupeperusha sauti.

Wahadhiri wa vyuo vikuu wanasema satelaiti hiyo inaweza kutoa huduma tofuati ikiwemo kukusanya taarifa zitakazosaidia katika kilimo na usalama, kutabiri hali ya hewa na hata kukabiliana na majanga.

Kenya kwa sasa inakabiliwa na janga la mafuriko ambalo limesababisha maafa makubwa.

Takriban watu mia mbili wamepoteza maisha yao, huku wengine zaidi ya laki mbili wamepoteza makaazi yao.

Huenda ufanisi katika uzinduzi wa satelaiti hii utaisaidia serikali pakubwa katika kujitayarisha kupambana na majanga ya aina hiyo.

Uzinduzi wa satelaiti hiyo leo unatokana na ushirikiano kati ya Idara ya Uhandisi katika Chuo Kikuu cha Nairobi, afisi ya masuala ya anga za juu ya Umoja wa Mataifa, na Shirika la utafiti wa anga za juu la Japan.

Kenya itaanza kushughulika kuunda satelaiti kubwa na bora zaidi iwapo uzinduzi wa leo utafanikiwa.