Author: E-FM CO LTD

Waziri mkuu wa New Zealand Jacinda Ardern anasema watu 49 wameuawa na wengine zaidi ya 20 wamejeruhiwa vibaya baada ya kuzuka mashambulio katika misikiti miwili katika mji wa Christchurch, huko New Zealand.

Waziri mkuu huyo amelitaja shambulio hilo kuwa mojawapo lililotanda ‘kiza kikubwa’ siku ya leo nchini humo.

Wanaume watatu na mwanamke mmoja wamekamatwa, kamishna wa polisi Mike Bush anasema, lakini ameonya kwamba huenda washukiwa zaidi wapo.

Inaarifiwa kwamba washambuliaji hao hawakuwa kwenye orodha ya magaidi wanaosakwa lakini ni wazi kwamba wana itikadi kali.

Waziri mkuu wa Australia Scott Morrison amesema mojawapo ya waliokamatwa ni raia wa Australia.

Amemtaja mshukiwa wa shambulio hilo kuwa “gaidi mwenye itikadi kali za mrengo wa kulia”.

Walioshuhudia mkasa huo wameambia vyombo vya habari kwamba walilazimika kutoroka kuokoa maisha yao na waliona watu walioanguka chini wanaovuja damu nje ya mskiti wa Al Noor.

Polisi inasisitiza kwamba hali bado haijaimarika na wamethibitisha pia kwamba “vilipuzi kadhaa vilivyofungwa kwenye gari vimeharibiwa”.

Maafisa wameshauri misikiti yote katika mji huo ifungwe mpaka ilani itakapotolea, wakieleza kwamba hili lilikuwa shambulio la vurugu ambalo halikutarajiwa.

Mohan Ibrahim, ambaye alikuwa katika eneo hilo la msikiti wa Al Noor ameliambia gazeti la Herald: “Awali tuliona ni hitilafu za umeme lakini mara tu, watu wote wakaanza kutoroka.

“Bado rafiki zangu wamo ndani. Nahofia usalama wa maisha ya rafiki zangu.”

Nini kilichofanyika katika mskiti?

Bado haijulikani wazi nini kilichofanyika ndani ya misikti hiyo, taarifa mpaka sasa zimetoka kwa walioshuhudia mkasa na waliozungumza na vyombo vya habari.

Mashahidi wametaja kuona watu wakiwa wameanguka chini wanavuja damu.

Inaarifiwa mshambuliaji alilenga sehemu ya maombi ya wanaume, na baadaye kuelekea katika sehemu ya wanawake.

Watu wamehamishwa pia kutoka msikiti wa pili katika kitongoji cha Linwood na kamishna wa polisi amesema “watu kadhaa wameuawa ” katika maeneo mawili.

 

Kiongozi mpya katika Jamhuri ya Kidmeokrasi ya Congo, Felix Tshisekedi na mtangulizi wake Joseph Kabila wamesema wameamua kuunda serikali ya muungano kufuatia mazungumzo, shirika la habari la AFP linaripoti.

Licha ya ushindi wa rais Tshisekedi — kiongozi huyo amejikuta akilazimika kugawanya uongozi tangu uchaguzi huo wa urais.

Mpaka sasa hajafanikiwa kumteua waziri mkuu kutokana na kwamba muungano wa Kabila – Common Front for Congo (FCC) una uwingi katika bunge la taifa.

Mkwamo huo umeweka kizuizi kwa maazimio ya Tshisekedi kuigeuza nchi hiyo inayogubikwa kwa rushwa na tuhuma za ukiukaji wa haki za binaadamu.

Katika taarifa ya pamoja hapo jana Jumatano, Tshisekedi na Kabila wamesema kwamba licha ya “FCC kuwa na uwingi mkubwa bungeni” katika kuidhinisha matakwa yalioelezewa na wapiga kura, FCC na CACH wanaonesha uwajibikaji “wa malengo yao ya pamoja kuongoza pamoja kama sehemu ya serikali ya muungano” linaripoti AFP.

Taarifa hiyo inafuata ziara ya Tshisekedi nchini Namibia wiki iliyopita ambapo alielezea kukasirishwa kwake kwa kutoweza kuwa na uwingi kuunga mkono chaguo lake la wadhifa wa waziri mkuu.

Kwa miaka 18 iliyopita, taifa lenye utajiri wa madini Jamhuri ya Kidemokrasi ya Congo limeongozwa na mtu mmoja: Joseph Kabila.

Kwa muda ilionekana kana kwamba Tshishekedi, jina lake halingekuwa kwenye karatasi za kura.

Kuongezea hilo, wakosoaji wake pia walikuwa wakisema Tshisekedi hajawahi kushikilia wadhifa wowote wa juu au kuwa na uzoefu wa usimamizi.

Lakini kadri muda ulivyosogea amefanikiwa kupanda cheo, kuanzia mwaka 2008 ambapo alikuwa katibu wa taifa aliyeangazia masuala ya uhusiano wa nje.

Tshisekedi, ingawa hana uungwaji mkono mkubwa kama wa babake, mwaka jana alisema kwamba akishinda urais ataunda tume ya ukweli, haki na maridhiano na kumuwajibisha Bw Kabila. Lakini alisema atamruhusu kusalia nchini DR Congo.

Changamoto kubwa ni kuangalia vipi Tchisekedi anaweza kuleta amani na maridhiano kwa taifa hilo hususan eneo la mashariki ambako kumeshuhudia ghasia na umwagikaji damu mkubwa wa raia, na uwepo wa wanamgambo waliojihami wanaotekeleza mashambulio.

Ni wazi kwamba ni wakati wa kihistoria kwa upinzani wa nchi hiyo, ambao umekuwa kando kando katika siasa za nchi kwa miongo kadhaa.

Lakini swali kubwa sasa ni je makubaliano haya ya kuunda serikali ya muungano yana uzito kiasi gani katika ushawishi wa kiongozi huyu mkuu, na inaweka wapi matumaini ya raia wa Congo katika swala la mageuzi nchini?

cc;BBCswahili

Mwanamume mmoja ameshambuliwa na simba aliyemfuga nyumbani kwake mashariki mwa Jamhuri ya Czech

Michal Prasek alimmiliki simba huyo mwenye miaka 9 na simba jike aliyemfuga kwa ajili ya kuzalisha , hatua inayoarifiwa kuzusha wasiwasi kutoka kwa wakaazi.

Babake Prasek aliupata mwili wake ndani ya kizuizi cha simba huyo na kuambia vyombo vya habari kwamba kilikuwa kimefungwa kwa ndani.

Wanyama hao waliokuwa wanaishi katika vizuizi tofuati, walipigwa risasi na kuuawa na polisi walioitwa katika eneo hilo.

Msemaji wa polisi amewaambia waandishi habari kwamba ilikuwa muhimu kwa simba hao kuuliwa ili kumfikia marehemu.

Prasek, mwenye umri wa miaka 33, alimnunua simba huyo mnamo 2016 na simba jike huyo mwaka jana, na aliwaweka wote katika vizuizi alivyovitengeneza katika ua lake katika kijiji cha Zdechov.

Awali alikatazwa ruhusa ya kujenga vizuizi hivyo, na alitozwa faini kwa kufuga wanyama hao kinyume na sheria.

Lakini mvutano wake na maafisa wa utawala ulifikia mkwamo baada ya kukataa kuruhusu mtu yoyote kuingia kwake.

Ukosefu wa vituo mbadala katika Jamhuri hiyo ya Czech, imemaanisha kwamba haingewezekana wanyama hao kuondolewa kwa lazima.

Prasek aligonga vichwa vya habari mwaka jana baada ya mwendesha baiskeli kupambana na simba hao wakati Prasek alipokuwa akiwatembeza huku akiwa amewafunga kwenye nyororo.

Baada ya polisi kuingilia kati, tukio hilo lilitazamwa kama ajali ya trafiki.

“Tukio la leo huenda likasaidia hatimaye kutatua tatizo hili la muda mrefu,” amesema meya wa Zdechov , Tomas Kocourek.

 

Rubani wa naibu rais William Ruto amefariki katika jali ya ndege baada ya helikopta aliyokuwemo kuanguka nchini Kenya.

Taarifa katika vyombo vya habari nchini zinaeleza kwamba ndege hiyo ilianguka Jumapili mwendo wa saa mbili usiku katika eneo la Turkana.

Inaarifiwa kwamba Kapteni Mario Magonga amefariki pamoja na abiria wengine wanne.

Polisi inasema helikopta hiyo imeanguka katika eneo la Labolo, kisiwa chenye milima ya volcano katikakati ya ziwa Turkana – Central Island National Park kaskazini magharibi mwa Kenya.

“Taarifa zilizopo zinaashiria kwamba ndege mbili zilitua mapema katika kambi ya Lobolo katika kisiwa hicho kilichopo kwenye mbuga ya kitaifa, hatahivyo moja ndio iliyofanikiwa kutua salama katika eneo hilo,” idara ya polisi imesema katika taarifa yake rasmi.

Inaarifiwa kwamba vikosi vya usalama vimetumwa katika eneo hilo katika kusaidia kwenye jitihada za kuondosha miili na masalio ya ndege hiyo.

Kufikia sasa, chanzo cha ajali bado hakijajulikana.

Kapteni Magonga ni nani?

Alikuwa rubani wake naibu rais wa Kenya William Samoei Ruto.

Aliwahi kuwa rubani katika jeshi la Kenya.

Ni mzawa wa Nyamataro, Kitutu Chache kusini, kaunti ya Kisii – kusini magharibi mwa Kenya.

Babake ni mwanajeshi mstaafu; Brigedia (rtd) Magonga.

Alikuwa rubani mkuu wa helikopta za kampuni ya KIDL helicopters – inayotoa huduma za usafiri binafsi katika eneo zima la Afrika mashariki.

Alikuwa mkufunzi aliyehitimu wa helikopta.

Alipokea mafunzo kutoka kikosi cha ulinzi Kenya KDF.

Ana uzoefu wa kuendesha ndege kwa zaidi ya saa 5500 kwenye ndege za injini moja na injini zaidi ya moja.

Kwa waliofahamu, wanamueleza kuwa rubani aliye na taaluma na uzoefu mkubwa, na aliheshimika pakubwa.

Waandalizi wa shindano la wanawake walio na maumbo makubwa nchini Uganda wamewasilisha malalamiko yao kwa spika wa bunge kufafanua madhumuni yao.

Wamesema kuwa lengo lao sio kutumia shindano la ‘Miss Curvy Uganda” kuvutia watalii kuja nchini humo.

”Haya ni mashindano ya urembo wa wanawake wanene”alisema Annie Mungoma, mkurugenzi mkuu wa mashindano hayo.

Bi. Mugoma aliongeza kuwa mtazamo wao itaondosha fikra za kimagharibi kuwa urembo unamaanisha mtu kuwa mwembamba.

”Tunataka kuwapatia motisha wanawake wenye maumbo makubwa kujiamini kwamba wao pia ni warembo”.

Siku mbili zilizopita spika wa bunge Rebecca Kadaga aliyepinga vikali mashindano hayo amebadili msimamo wake baada ya kupokea ufafanuzi huo.

Ameahidi mkono juhudi zao na kutoa ufafanuzi kwa bunge ili kuondoa fikra kwamba mashindano hayo ni ya aibu kwa jinsia ya mwanamke.

Tangu shindano shindano hilo lilipozinduliwa mapema mwezi huu, wanasiasa,wanaharakati wa haki za wanawake na viongozi wa kidini wamejitokeza na kulishtumu vikali.

Waziri wa utalii nchini Uganda Godfrey Kiwanda alipendekeza kuwe na onyesho la wanawake wenye maumbo makubwa ili kuvutia wageni zaidi wanaoitembelea nchi hiyo.

Akizungumza katika uzinduzi wa shindano hilo , waziri huyo alisema kuwa itakuwa “tukio la kipekee ambalo litawaonesha mabanati wakionesha maumbo yao mazuri yaliyo nona”

Kauli hiyo ilizua mjadala mkali hasa katika mitandao ya kijamii huku baadhi ya watu wakimshutumu bwana Kiwanda kwa kuzungumza juu ya wanawake wanene kama wananyama huku mwanamke mmoja akihoji kama ingewezekana basi wawekwe bustanini ili watazamwe kama wanayama watendewavyo “.

Watu 20 wamekufa na wengine 40 kujeruhiwa baada ya kutokea ajali ya treni katika njia kuu ya treni nchini humo.

Tukio hilo limetokea baada ya treni hiyo kugonga kizuizi cha kupunguza kasi, katika kituo kimoja cha treni katikati ya mji.

Ajali hiyo imesababishwa na kulipuka kwa tanki la mafuta la treni hiyo, hali iliyosababisha majengo ya jirani pia kuungua.

chanzo cha ajali hiyo bado hakijajulikana, lakini saa chache baadaye, Waziri anayeshughulika na usafiri Hisham Arafat alijiuzulu.

Watu walioshuhudia ajali hiyo wamesema wameona miili kadhaa katika janga baya kukumba nchi hiyo katika siku za hivi karibuni, hususan kwa usafiri wa treni.

Mmoja wa mashuhuda, Ahmed Mahmoud ameliambia shirika la Habari la AFP, kuwa alitoa miili ya watu 20 na kuiweka kwenye gari la wagonjwa, yote ikiwa imechomeka.

Aidha amesema kawaida treni likikaribia kituoni huja kwa mwendo wa taratibu, lakini siku hiyo lilikuwa katika kasi.

Awali vyombo vya habari vya nchi hiyo viliripoti kwamba watu waliofariki ni 25 huku wengine 50 wakiwa wamejeruhiwa.

Waziri mkuu wa nchi hiyo Mostafa Madbouli ameapa kutoa adhabu kali kwa yeyote yule atakayehusika kupanga ajali hiyo.

Kwa upande wake, Rais wa nchi hiyo Abdul Fattah al Sisi ametuma salamu za rambirambi kwa familia za marehemu na kusisitiza kuwa watu wote waliojeruhiwa watapata msaada wowote watakaohitaji.

 

Wakili wa zamani wa rais wa Marekani Donald Trump, Michael Cohen amedai kwamba kiongozi huyo alimtaka adanganye kuhusu mpango biashara kuhusu biashara ya ujenzi wa jengo mjini Moscow wakati wa kampeni ya uchaguzi wake.

Katika ushahidi alioutoa bungeni, Cohen amesema Trump aliratibu mipango ya siri kwa ujenzi wa jengo kubwa, hata wakati alikana kuhusika na biashara yoyote Urusi.

Ameeleza pia kwamba Trump alifahamu kuhusu kufichuliwa kwa barua pepe zilizodukuliwa za chama cha Democrat na amemuita kiongozi huyo “mbaguzi”, “tapeli” na “muongo”.

Trump alijibu: “Anadanganya ili kupunguza kifungo chake gerezani.”

Rais wa Marekani alichukua muda katika kujitayarisha kukutana na kiongozi wa Korea kaskazini Kim Jong-un huko Hanoi, Vietnam, siku ya Jumatano kumjibu kupitia ujumbe wa Twitter wakili wake huyo wa zamani.

Cohen amesema nini kuhusu mradi wa Moscow?

Katika ushahidi wake wa wazi katika kamati ya bunge la wawakilishi Jumatano, amesema Trump “alifahamu na aliratibu” mipango ya ujenzi wa jengo ‘Trump Tower’ mjini Moscow, huku akikiri wazi kwamba hana biashara yoyote na Urusi.

“Wakati huo huo nilikuwa nashauriana na kujadiliana na Urusi kwa niaba yake,” Cohen ameeleza katika ushahidi wake, “angeniangalia machoni na aniambie hakuna bishara yoyote Urusi na alafu atoke aende kuwadanganya raia wa Marekani kwa kusema hilo hilo. Kwanamna yake, alikuwa akiniambia nidanganye..”

“Alitaka nidanganye,” aliongeza.

Hatahivyo, Cohen ameshtakiwa kwa kulidnagnya bunge alipotoa ushahidi mnamo 2017 kwambajitihada za kujenga jengo refu la Trump huko Moscow zilisitishwa kufikia Januari 2016.

tangu hapo amekiri kwamba kumekuwepo majadiliano yalioendelea hadi Juni 2016 wakati wa kampeni ya uchaguzi, licha ya kwamba ujenzi wa mradi huo haukuendelea.

Cohen ameomba msamaha kwa kauli yake ya awali bungeni, ambayo anatuhumu kwamba ‘ilikaguliwa na kuhaririwa’ na mawakili wa Trump.

Cohen amewaambia wabunge kwamba Trump ni mbaguzi wa rangi.

Amesema: “Aliwahi kuniuliza nitaje jina la nchi moja ambayo inaongozwa na mtu mweusi ambayo sio ‘shithole’ kwa maana ya shimo la choo.

“Huu ulikuwa wakati ambapo Barack Obama ndiye alikuwa rais wa Marekani.

“Tulipokuwa tumo ndani ya gari tukipita mtaa duni huko Chicago, alitamka kwamba ni watu weusi tu wanaoweza kusihi katika hali kama hiyo.

“Na aliniambia kwamba watu weusi hawawezi kumpigia kura kwasababu ni wapumbavu. Lakini bado niliendelea kufanya kazi naye.”

Mchambuzi wa masuala ya kisiasa nchni Tanzania, said Msonga ambaye ameifuatilia sakata hii, ametathmini kwamba katika maelezo ambayo bwana Cohen ameyatoa bungeni, ‘unaona moja kwa moja amejaribu kushambulia baadhi ya hoja za rais Donald Trump ambazo amekuwa akizisimamia kwa muda mrefu.

‘Kwa mfano amekuwa akishughulika na masuala ya vyombo vya habari, familia pamoja na masuala ya ule ukuta wa Mexico na urafiki wake na viongozi ambao wao walikuwa wanafikiria ni maadui wa Marekani’.

Kwa jumla, Msonga anasema ni mambo ambayo yanaweza yakaibua hoja na hisia ambazo zinaweza zikampatia bwana Trump kipindi kigumu wakati wa uchaguzi wa mwaka 2020 pale atakapowania nafasi ya kuiongoza tena Marekani.

Jeshi la Marekani jana lilisema kuwa limefanya mashambulizi ya anga nchini Somalia na kufanikiwa kuwaua wapiganaji 35 wa kundi la kigaidi la Al Shabaab.

Marekani imekuwa ikifanya mashambulizi mara kadhaa dhidi ya Al Shabaab kwa lengo la kuviunga mkono vikosi vya Umoja wa Mataifa vinavyoendelea kuisaidia Serikali ya Somalia kupambana na Al Shabaab kwa miaka kadhaa sasa.

Kupitia tamko lake, Kamandi ya Marekani nchini Afrika imeeleza kuwa ilifanya mashambulizi hayo Jumapili katika eneo lililo karibu na Beledweyne mkoani Hiran nchini Somalia.

“Mashambulizi haya ya anga yalilenga wapiganaji wa Al Shabaab wenye silaha ambao walikuwa wanatawanywa kwenye maeneo mbalimbali katika vijiji,” imeeleza taarifa hiyo.

Al Shabaab wanatekeleza mashambulizi ya kigaidi kwa lengo la kuipindua Serikali ya Somalia na kusimika utawala wa kidini wenye itikadi kali.

Vikosi vya Umoja wa Mataifa vimeendelea kuiongezea nguvu Serikali dhidi ya kundi hilo, ingawa bado linaonekana kuwa na uthubutu wa kutekeleza mashambulizi katika maeneo mbalimbali.

Januari mwaka huu, Al Shabaab ilivamia nchini Kenya na kufanya shambulizi la kigaidi katika eneo la Riverside.  Makumi ya watu walipoteza maisha kutokana na shambulizi hilo.